அன்பு மகளுக்கு

எப்படி வாப்பா ?
மகள்தான் பிறப்பாலென்று
உங்களுக்கு
தெரியுமென்று கேட்கிறாயா மகளே ...
அண்ணலாரின்
அருமை மகள்
பாத்திமா போல
ஒரு மகள் வேண்டுமென்னும்
பேராசைதான் மகளே ...
பாத்திமாவாய் இல்லாது
அவர் மக்கள்
ஹசன், ஹுசைன் போல்
நான் ஆனால்
என்ன செய்வீங்க
வாப்பா என்று
நினைக்கிறிங்களா மகளே ...
ஆணென்றாலும் பெண்ணென்றாலும்
அல்லாஹ் தார
அருட்கொடைய
அல் ஹம்துலில்லாஹ்
என்று சொல்லி
ஆனந்தமா ஏற்றிடுவேன்
அன்பு மகளே ...
நாலு நாளா
நம்மூரு ஆசுபத்திரியில
அட்மிட்டாகியிருந்த உங்க உம்மாவ
நேற்று பகல்தான் மகளே
டிக்கட் வெட்டி
வீட்ட கூட்டிவந்தன்
நீங்க
வளர தொடங்கின நாள்முதலா
அவ வயித்துல
அன்னந்தண்ணி இறங்குதில்ல
ஆசைப்பட்டத
கடிச்சி தின்னா
அடுத்த நிமிஷம்
வாந்தி வாந்தியா வந்திடுது
நாற்பத்து நாலுகிலோ
இருந்த உங்க உம்மா
இப்ப
எட்டுக்கிலோ குறஞ்சிட்டா
சத்தான சாப்பாடு
சாப்பிட்டாத்தான்
அன்புமகள் உங்களுக்கு
ஆரோக்கியாமாம் எண்டு
டாக்ட்டர் மாமா சொன்னதால
இப்பல்லாம்
கொஞ்சம் கொஞ்சமா சாப்பாட்ட
கஷ்டப்பட்டு
இஸ்டப்பட்டு சாப்பிடுறா
நீங்க
வயிற்றுள இருந்து
துடிக்கக்குள்ள
உம்மாவ
உதைக்கவேணா மகள்
பாவம் உம்மா
அவ வலி தங்கமாட்டா தங்கம்
டாக்ட்டர் மாமா
சொல்லி இருக்காரு
நீங்க
பத்தாம்மாசம் பிறந்துடுவிங்கலாம்
இன்ஷா அல்லாஹ்
அதுவரைக்கும்
நானும் உம்மாவும்
நீங்க நல்லபடியா
பிறக்கணும் எண்டுசொல்லி
பிரார்த்திக்கிரம் செல்லக்குட்டி
கடைசியா
மகள்
நீங்க பிறந்ததும்
முதல் முத்தம்
யாருக்கு மகள் கொடுப்பிங்க
யாரு ?
உம்மாக்கா மகள் கொடுப்பிங்க
சமத்து பிள்ள மகள் நீங்க
எங்க
வாப்பாக்கெண்டு
சொல்லிடுவிங்களோ எண்டு
வாப்பா
ஒரு நிமிஷம்
பயந்துபோயிட்டன் செல்லமகள்

- பிரகாசக்கவி -